Latest News
ലഡാക്കിൽ ട്രക്ക് കൊക്കയിലേക്ക് മറിഞ്ഞ് ഒമ്പത് സൈനികർ കൊല്ലപ്പെട്ടു
ലഡാക്കിലെ ലേ ജില്ലയിൽ സൈനികർ സഞ്ചരിച്ചിരുന്ന ട്രക്ക് റോഡിൽ നിന്ന് തെന്നി അഗാധമായ കൊക്കയിലേക്ക് മറിഞ്ഞ് ഒമ്പത് സൈനികർ കൊല്ലപ്പെട്ടതായി റിപ്പോർട്ട്. മരിച്ചവരിൽ എട്ട് സൈനികരും ഒരു ജൂനിയർ കമ്മീഷൻഡ് ഓഫീസറും (ജെസിഒ) ഉൾപ്പെടുന്നു. പ്രതിരോധ ഉദ്യോഗസ്ഥരെ ഉദ്ധരിച്ച് എഎൻഐയാണ് അപകട വിവരം റിപ്പോർട്ട് ചെയ്‌തത്. അപകടത്തിൽ ഒരാൾക്ക് പരിക്കേറ്റതായും അധികൃതർ അറിയിച്ചിട്ടുണ്ട്.
കരു ഗാരിസണിൽ നിന്ന് ലേയ്ക്ക് സമീപമുള്ള ക്യാരിയിലേക്ക് പോവുകയായിരുന്ന ട്രക്ക് കൊക്കയിലേക്ക് വീഴുകയായിരുന്നു. ഒരു എസ്‌യുവിയും ആംബുലൻസും ഉൾപ്പെടെ മൊത്തം 34 ഉദ്യോഗസ്ഥരുള്ള ഒരു ട്രൂപ്പിന്റെ ഭാഗമായിരുന്നു ഇത്. തെക്കൻ ലഡാക്കിലെ നിയോമയിലെ കെറേയിൽ ശനിയാഴ്‌ച വൈകുന്നേരം ആറരയോടെയാണ് അപകടം ഉണ്ടായത്. സ്ഥലത്ത് രക്ഷാപ്രവർത്തനം പുരോഗമിക്കുകയാണെന്നാണ് അധികൃതർ അറിയിച്ചിരിക്കുന്നത്.