അക്രമം പരസ്യമായി വാദിക്കുന്ന തീവ്രവാദികളെ കാനഡ സ്വീകരിക്കുന്നു – എസ് ജയശങ്കർ

അക്രമം പരസ്യമായി വാദിക്കുന്ന തീവ്രവാദികളെ കാനഡ സ്വീകരിക്കുന്നുവെന്ന് വിദേശകാര്യ മന്ത്രി എസ് ജയശങ്കർ. കാനഡ തീവ്രവാദികൾക്കും ഭീകരവാദികൾക്കും പ്രവർത്തനയിടം നൽകുന്നു. വാഷിംഗ്ടൺ ഡിസിയിൽ നടന്ന പരിപാടിയിൽ ആണ് ജയശങ്കറിന്റെ ആരോപണം.

‘ഇന്ത്യന്‍ കോൺസുലേറ്റുകൾ കാനഡയില്‍ ആക്രമിക്കപ്പെടുന്നു. കാനഡയിലെ ഇന്ത്യൻ നയതന്ത്രജ്ഞർ എംബസിയിലോ കോൺസുലേറ്റിലോ പോകുമ്പോൾ സുരക്ഷിതരല്ല, അവരെ പരസ്യമായി ഭീഷണിപ്പെടുത്തുന്നു. കാനഡയിലെ വിസ പ്രവർത്തനങ്ങൾ പോലും താൽക്കാലികമായി നിർത്തിവയ്ക്കാൻ അത് ഇന്ത്യയെ നിർബന്ധിക്കുകയായിരുന്നു’ ഇന്ത്യൻ വിദേശകാര്യ മന്ത്രി പറഞ്ഞു.

ഭീകരർ, തീവ്രവാദികൾ, അക്രമത്തിന് പരസ്യമായി വാദിക്കുന്ന ആളുകൾ എന്നിവരോട് കാനഡയ്ക്ക് സ്വീകരണ മനോഭാവം ഉണ്ടെന്ന് ഭാരതം കരുതുന്നു. കനേഡിയൻ രാഷ്ട്രീയത്തിന്റെ നിർബന്ധം കാരണം അവർക്ക് കാനഡയിൽ പ്രവർത്തനയിടം നൽകുന്നുണ്ട്. ഇന്ത്യയിൽ നിന്നുള്ള സംഘടിത കുറ്റകൃത്യങ്ങൾ മനുഷ്യക്കടത്ത്, വിഘടനവാദം, അക്രമം, തീവ്രവാദം എന്നിവയുമായി ഇടകലർന്ന രാജ്യമാണ് കാനഡ. കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ ആരോപണങ്ങൾക്ക് മുമ്പുതന്നെ കാനഡയുമായുള്ള ഇന്ത്യയുടെ അഭിപ്രായവ്യത്യാസം ഈ വിഷയങ്ങളിലായിരുന്നു എന്നും ജയശങ്കർ പറഞ്ഞു.

കാനഡ നൽകുന്ന ഏത്‌ തെളിവിന്റെ അടിസ്ഥാനത്തിലും ട്രൂഡോയുടെ ആരോപണങ്ങൾ സംബന്ധിച്ച് അന്വേഷണം നടത്താൻ ഇന്ത്യ തയ്യാറാണ്. കാനഡയില്‍ വെച്ച് കൊല്ലപ്പെട്ട ഖലിസ്ഥാന്‍ ഭീകരവാദി ഹര്‍ദീപ് സിങ്ങ് നിജ്ജറിന്റെ മരണത്തില്‍ ഇന്ത്യയ്‌ക്കെതിരെ ചില തെളിവുകളുണ്ടെന്ന കാനഡയുടെ ആരോപണത്തിന്റെ പശ്ചാത്തലത്തിലായിരുന്നു ജയശങ്കറിന്‍റ ഈ മറുപടി പറഞ്ഞത്.