‘സർക്കാർ ചെലവിൽ ദത്തുപുത്രി സുഖിക്കുന്നു’, ഞാൻ സർക്കാരിന്റെ ചിലവിലല്ല, വീട് പോലും വാങ്ങിയിട്ടില്ല

കൊച്ചി . ഹനാനെ അറിയാത്ത മലയാളികളില്ല. ജീവിതത്തിന്റെ പ്രതിസന്ധികളോട് ഒറ്റക്ക് പോരാടി സ്വന്തം കാലിൽ ജീവിക്കുന്ന ഹനാന്റെ ഫേസ് ബുക്ക് കുറിപ്പാണ് ഇപ്പോൾ വൈറലായിരിക്കുന്നത്. മലയാളത്തിലെ വലിയ റിയാലിറ്റി ഷോയായ ബിഗ് ബോസിലെ സാന്നിദ്ധ്യമായിരുന്ന ഹനാൻ ഒരു സമയത്ത് വലിയ സൈബർ ആക്രമണം നേരിട്ടിരുന്നു.

‘സ‌ർക്കാരിന്റെ ദത്തുപുത്രി’ എന്നതടക്കമുള്ള പരിഹാസമാണ് ഹനാൻ ഇപ്പോൾ നേരിടുന്നത്. ഇപ്പോഴിതാ അത്തരം പരിഹാസങ്ങൾക്ക് മറുപടിയുമായി രംഗത്തെത്തിയിരിക്കുകയാണ് ഹനാൻ. സോഷ്യൽ മീഡിയയിൽ പങ്കുവച്ച കുറിപ്പിലാണ് ഹനാന്റെ പ്രതികരണം. എന്റെ പ്രവർത്തനങ്ങൾ ഇഷ്ടമായി മുഖ്യമന്ത്രി ഒരു അവാർഡ് തന്നു എന്നല്ലാതെ മറ്റൊരു ജീവിത ചിലവും ഞാൻ സർക്കാരിൽ നിന്ന് സ്വീകരിച്ചിട്ടില്ലെന്ന് ഹനാൻ തുറന്നു പറയുന്നു. ‘സ‌ർക്കാരിന്റെ ദത്തുപുത്രി’ എന്ന് പറഞ്ഞു ഇനിയും പരിഹസിക്കരുതെന്നും, തരാമെന്നു പറഞ്ഞ വീട് പോലും വാങ്ങിയിട്ടില്ലെന്നും, സംശയം ഉള്ളവർ ഒരു വിവരാവകാശം എഴുതി ചൊദിക്കൂ എന്നുമാണ് ഹനാൻ പറഞ്ഞിരിക്കുന്നത്.

ഹനാന്റെ ഫേസ് ബുക്ക് കുറിപ്പിന്റെ പൂ‌ർണരൂപം ഇങ്ങനെ

നീ ചിരിക്കരുത് നിന്റെ ചിരി ഭംഗി ഇല്ല എന്ന് പറയുന്നു ഒരു വിഭാഗം.എങ്ങനെ എങ്കിലും പച്ച പിടിച്ചു മുന്നോട്ടു പോകാൻ ശ്രമിക്കുമ്പോൾ നിനക്ക് ചേരുന്നത് പഴയ ജോലിയാണ്. വന്ന വഴി ഒന്നു തിരിഞ്ഞ് നടക്കുന്നത് നല്ലതാണ് എന്ന് ഉപദേശിച്ചു കൊണ്ടിരിക്കുന്ന മറ്റൊരു വിഭാഗം. മരമോന്തയാണ് നിന്നെ ആർക്കും കണ്ടൂടാ, നിന്റെ ശബ്ദം അലോസരം ഇങ്ങനെ എത്ര മാത്രം കുത്ത് വാക്കുകൾ സഹിക്കേണ്ടി വരുന്നു ഞാൻ ഇപ്പോഴും.

ഒന്ന് മനസ്സ് തുറന്നു ചിരിക്കാൻ ഉള്ള എന്റെ അവകാശത്തെ പോലും നിഷേധിക്കുന്നു. ആർക്കും ഉപദ്രവം ഇല്ലാതെ സന്തോഷമായി ജീവിതം മുന്നോട്ട് പോകുന്നു. എന്റെ പ്രവർത്തനങ്ങൾ ഇഷ്ടമായി മുഖ്യമന്ത്രി ഒരു അവാർഡ് തന്നു എന്നല്ലാതെ മറ്റൊരു ജീവിത ചിലവും ഞാൻ സർക്കാരിൽ നിന്ന് സ്വീകരിച്ചിട്ടില്ല. ഇപ്പോഴും വാടക വീട്ടിൽ ആണ്. സഹായം തരാം എന്ന് പറഞ്ഞ വീട് പോലും ഞാൻ വാങ്ങിയിട്ടില്ല. സർക്കാർ ചെലവിൽ ദത്ത് പുത്രി സുഖിക്കുന്ന് എന്ന് വിലയിരുത്തുന്നതിനും മുമ്പ് ദയവ് ചെയ്തു അതിൻ്റെ സത്യാവസ്ഥ ഒരു വിവരാവകാശം എഴുതി ചൊദിക്കൂ എല്ലാവരും.

വ്ലോഗ് ചെയ്തും നിരവധി കമ്പനികൾക്ക് പരസ്യങ്ങൾ ചെയ്തും ട്രേഡിംഗ് വഴിയും കിട്ടുന്ന വരുമാനത്തിൽ സ്വന്തം കാലിൽ നിന്ന് അന്തസായി തന്നെയാണ് ഞാൻ ജീവിക്കുന്നത്. ആരോടും കൈ നീട്ടി അല്ല. അഥവാ എന്തെങ്കിലും ബുദ്ധിമുട്ട് വന്നാൽ തന്നെ നോക്കാൻ വീട്ടിൽ ഒരു അനിയൻ കുട്ടൻ ഉണ്ട്. ചില സുഹൃത്തുക്കളും ഉണ്ട്. എന്നെ ഇങ്ങനെ ഇട്ട് ചൂഷണം ചെയ്യരുത്. സഹിക്കുന്നതിന് ഒരു പരിധി ഉണ്ട്. അഞ്ച് വർഷം മുമ്പ് കഷ്ടപ്പെട്ട കാലത്ത് പിടിച്ചു നിൽക്കാൻ മീൻ വിറ്റു ഉപജീവനം കണ്ടെത്തി എന്ന് കരുതി പഴയതിലും മെച്ചപ്പെട്ട ജോലിയും നല്ല ജീവിത സാഹചര്യവും കണ്ടെത്തിയതിൽ എന്തെങ്കിലും തെറ്റുണ്ടോ.