Latest News
മണിപ്പൂരിലെ സ്ഥിതി ആശങ്കാജനകം, കേന്ദ്രം തീരുമാനം എടുക്കണം – ആർഎസ്എസ്
പൂനെ . മണിപ്പൂരിലെ സ്ഥിതി ആശങ്കാജനകമെന്നും, തീരുമാനങ്ങൾ എടുക്കേണ്ടത് കേന്ദ്ര സർക്കാരാണെന്നും ആർഎസ്എസ്. സംസ്ഥാനത്ത് രണ്ട് വിഭാഗങ്ങൾ തമ്മിലുള്ള സംഘർഷം അതിരൂക്ഷമാണെന്നും കേന്ദ്രസർക്കാരാണ് അടിയന്തര നടപടികൾ എടുക്കേണ്ടതെന്നും ആർഎസ്എസ് ജോയിൻ ജനറൽ സെക്രട്ടറി മൻമോഹൻ വൈദ്യ പറഞ്ഞു. പൂനെയിൽ മൂന്ന് ദിവസമായി നടക്കുന്ന ആർഎസ്എസ് വാർഷിക കോർഡിനേഷൻ കമ്മറ്റി യോഗ ശേഷം മാധ്യമങ്ങളോട് സംസാരിക്കുകയായിരുന്നു മൻമോഹൻ വൈദ്യ.
മറാത്ത സംവരണ പ്രക്ഷോഭ കാര്യത്തിലും ആർഎസ്എസിന്റെ പരോക്ഷമായി വിമർശനം ഉണ്ടായി. അടിച്ചമർത്തപ്പെട്ട ജനവിഭാഗങ്ങളെ ഉയർത്തിക്കൊണ്ട് വരാനാണ് സംവരണമെന്നും ഇപ്പോഴത്തെ ആവശ്യങ്ങൾ പലതും രാഷ്ട്രീയ താത്പര്യം ആണെന്നുമായിരുന്നു പ്രതികരണം. രാജ്യത്തിൻ്റെ പേര് ഭാരതം എന്ന് തന്നെയാണെന്നും അത് അങ്ങനെ തന്നെയായിരിക്കണമെന്നും ആർഎസ്എസ് പ്രതികരിച്ചു. ഭാരതമെന്നാണ് പുരാതന കാലം മുതലുള്ള പേര്. സനാതന ധർമ്മം ഒരു മതമല്ല. അതൊരു ആത്മീയ ജനാധിപത്യമാണ്. പ്രസ്താവന നടത്തുന്നവർ സനാതന ധർമ്മത്തെക്കുറിച്ച് പഠിക്കുകയാണ് വേണ്ടതെന്നും ആർഎസ്എസ് പറഞ്ഞു.