‘ഷക്കീലാസ് ഡ്രൈവിംഗ് സ്കൂൾ’ ട്രെൻഡിങ്ങിലേക്ക്

നെറ്റ്ഫ്ലിക്സിലെ ജനപ്രിയ സീരീസായ സെക്സ് എജ്യുക്കേഷൻ ഫൈനൽ സീസൺ പുറത്തിറങ്ങിയത് സെപ്റ്റംബർ 21 നാണ്. മലയാളിക്ക് ലൈംഗിക വിദ്യാഭ്യാസത്തെ കുറിച്ച് ബോധവത്കരണവുമായി എത്തുന്ന വീഡിയോ യൂട്യൂബിൽ ട്രെൻഡിങ് ലിസ്റ്റിൽ ഇടം നേടിയിരിക്കുകയാണ്. മികച്ച പ്രതികരണം നേടി സീരീസ് മുന്നോട്ടു പോകുന്നതിനിടെയാണ് മലയാളത്തിൽ പുറത്തിറങ്ങിയ പ്രമോയും ശ്രദ്ധേയമായിരിക്കുന്നത്. നെറ്റ്ഫ്ലിക്സ് ഇന്ത്യ പുറത്തിറക്കിയ പ്രമോയിൽ ഷക്കീലയെയാണ് അവതരിപ്പിച്ചിട്ടുള്ളത്.

ഷക്കീലാസ് ഡ്രൈവിംഗ് സ്കൂൾ എന്ന പേരിൽ മൈത്രി അഡ്വർടൈസിംഗ് വർക്സ് തയ്യാറാക്കിയ പ്രമോയിൽ ഇതുവരെ കാണാത്ത വേഷത്തിലാണ് ഷക്കീലയെ എത്തുന്നത്. സെക്സ് എജ്യുക്കേഷൻ എന്താണെന്നും അതിന‍്റെ പ്രധാന്യവും മലയാളിക്ക് ഷക്കീല വ്യക്തമാക്കുന്നതാണ് പ്രമോ എന്നതാണ് ശ്രദ്ധേയം. കെവി ശിവപ്രസാദാണ് സംവിധാനം ചെയ്ത പ്രമോക്ക് ഷക്കീല അഭിനയിച്ച ഡ്രൈവിംഗ് സ്കൂൾ എന്ന സിനിമയുടെ പേര് തന്നെയാണ് നൽകിയിരിക്കുന്നത്. ഗോപു, ഷീലു എന്നീ യുവാക്കൾ ഡ്രൈവിംഗ് പഠിക്കാനെത്തുന്നിടത്തു നിന്നാണ് വീഡിയോയുടെ തുടക്കം.

ലൈംഗികതയെ കുറിച്ചുള്ള തെറ്റിദ്ധാരണകളെ കുറിച്ചും പങ്കാളിയുടെ അഭിരുചിയും അനുവാദവും സെക്സിൽ എത്രമാത്രം പ്രാധാന്യമർഹിക്കുന്നുണ്ടെന്ന് പ്രമോയിൽ പറയുന്നുണ്ട്. നെറ്റ്ഫ്ലിക്സ് പുറത്തിറക്കിയ സെക്സ് എജ്യുക്കേഷൻ പേര് സൂചിപ്പിക്കുന്നതു പോലെ തന്നെ ലൈംഗികതയെ കുറിച്ചുള്ള കൃത്യവും വ്യക്തവുമായ ബോധവത്കരണമാണ് രസകരമായി അവതരിപ്പിച്ചിട്ടുള്ളത്. ആസാ ബട്ടർഫീൽഡ് , ഗില്ലിയൻ ആൻഡേഴ്‌സൺ , എൻകുറ്റി ഗത്വ , എമ്മ മക്കി , കോണർ സ്വിൻഡെൽസ് , കേദാർ വില്യംസ്-സ്റ്റിർലിംഗ് , അലിസ്റ്റർ പെട്രി , മിമി കീൻ എന്നിവരാണ് പ്രധാന താരങ്ങള്‍. 2019 ജനുവരി 11 നാണ് സീരീസിന്റെ ആദ്യ സീസൺ പുറത്തിറങ്ങിയത്. ആഗോള തലത്തിൽ വൻസ്വീകാര്യതയാണ് സീരീസിന് ലഭിച്ചു കൊണ്ടിരിക്കുന്നത്.