രാജ്യത്തുടനീളം 411 സ്ത്രീശക്തിസമ്മേളനങ്ങൾ നടത്താനൊരുങ്ങി ആർഎസ്എസ്

പൂനെ . സാമൂഹികപുരോഗതിയുടെ അടിസ്ഥാനഘടകം കുടുംബങ്ങളാണെന്നും സമൂഹത്തിന്റെ എല്ലാ മേഖലകളിലും സ്ത്രീകൾ നേതൃപരമായ പങ്ക് വഹിക്കണമെന്നും ആർഎസ്എസ് സഹസർകാര്യവാഹ് ഡോ. മൻമോഹൻ വൈദ്യ. ആർഎസ്എസിന്റെ വിവിധക്ഷേത്രസംഘടനകൾ സ്ത്രീകളുടെ മുന്നേറ്റത്തിനായി പരിശ്രമിക്കുമെന്നും പൂനെയിൽ നടന്ന അഖിലഭാരതീയ സമന്വയ ബൈഠക്കിൽ ഡോ. മൻമോഹൻ വൈദ്യ പറഞ്ഞു. സ്ത്രീ പങ്കാളിത്തം വർധിപ്പിക്കുക എന്ന ലക്ഷ്യത്തോടെയാണ് ആർഎസ്എസ് സമൻവയ് ബൈഠക് സമാപിച്ചത്.

സാമൂഹികപ്രവർത്തനങ്ങളിൽ സ്ത്രീശക്തിയുടെ ക്രീയാത്മകത അഭിനന്ദനാർഹമാണ്. സാമൂഹിക പുരോഗതിയുടെ അടിസ്ഥാന ഘടകം കുടുംബമാണ്. കുടുംബങ്ങളെ നയിക്കുന്ന സ്ത്രീകളുടെ നേതൃശേഷി രാഷ്‌ട്രപുരോഗതിയിലും ദൃശ്യമാകണം. എല്ലാമേഖലകളിലും സ്ത്രീകളെ ഉയർത്തികൊണ്ട് വരുന്നതിന്റെ ഭാഗമായി രാജ്യത്തുടനീളം 411 സ്ത്രീശക്തിസമ്മേളനങ്ങൾ ആർ എസ് എസ് സംഘടിപ്പിക്കും. ഇതുവരെ 12 സംസ്ഥാനങ്ങളിലായി 73 സമ്മേളനങ്ങൾ സംഘടിപ്പിച്ചു. ഒരു ലക്ഷത്തി ഇരുപത്തിമൂവായിരത്തിലധികം സ്ത്രീകൾ ഈ സമ്മേളങ്ങളിൽ പങ്കെടുത്തു, ആർഎസ്എസ് സഹസർകാര്യവാഹ് പറഞ്ഞു.

പൂനെയിൽ നടന്ന അഖിലഭാരതീയ സമന്വയ ബൈഠക്കിൽ 36 വിവിധക്ഷേത്ര സംഘടനകളിൽ നിന്ന് 246 പ്രതിനിധികൾ ആണ് പങ്കെടുത്തത്. ആർഎസ്എസ് സർസംഘചാലക് ഡോ. മോഹൻഭാഗവത്, സർകാര്യവാഹ് ദത്താത്രേയ ഹൊസബാളെ എന്നിവർ നേതൃത്വം നൽകി.