പിണറായിയുടെ ഭരണയന്ത്രം തുരുമ്പിച്ചെന്ന് മുൻധനമന്ത്രി ടി.എം.തോമസ് ഐസക്

തിരുവനന്തപുരം . സംസ്ഥാന ഭരണ സംവിധാനത്തിലെ ഭരണയന്ത്രം തുരുമ്പിച്ചെന്ന് മുൻധനമന്ത്രി ടി.എം.തോമസ് ഐസക്. ഭരണ സംവിധാനത്തെ വിമർശിച്ച് ചിന്തയിൽ എഴുതിയ ലേഖനത്തിലാണ് മുൻധനമന്ത്രി ടി.എം.തോമസ് ഐസക് ഇങ്ങനെ പറഞ്ഞിരിക്കുന്നത്. ‘വൻകിട പ്രൊജക്ടുകൾ ഫലപ്രദമായി നടപ്പാക്കുന്നതിൽ ഭരണയന്ത്രം പ്രാപ്തമല്ല. സേവനമേഖലയിലെ രണ്ടാംതലമുറക്ക് പ്രശ്നങ്ങൾ കൈകാര്യം ചെയ്യാൻ കഴിയുന്നില്ല. ടി.എം.തോമസ് ഐസക് വിമർശിച്ചു.

‘സേവന നിലവാരത്തെക്കുറിച്ചുള്ള ജനങ്ങളുടെ പരാതികളേറുന്നു. വ്യവസായ പ്രോത്സാഹന ഏജൻസികളുടെ പ്രവർത്തനം മറ്റു സംസ്ഥാനങ്ങളെ അപേക്ഷിച്ച് പിന്നിലാണ്. റെഗുലേറ്ററി വകുപ്പുകൾ പലപ്പോഴും ജനവിരുദ്ധമാകുന്നു. കാലോചിതമായി നടത്തേണ്ട പരിഷ്കരണങ്ങൾ ഈ രംഗത്ത് ഉണ്ടായിട്ടില്ല എന്നതിന്റെ ഫലമായിട്ടാണ് നമ്മുടെ ഭരണയന്ത്രം തുരുമ്പിച്ചതും വേണ്ടത്ര ജന സൗഹാർദ്ദപരമല്ലാത്തതുമായ അവസ്ഥ ഉണ്ടായിട്ടുള്ളത്.’ടി.എം.തോമസ് ഐസക് പറഞ്ഞു.

‘കാർഷിക മേഖലയിലെ വളർച്ച രൂക്ഷമായ മുരടിപ്പിൽ തുടരുകയാണ്. പ്രതികൂലമായ കമ്പോള സ്ഥിതിയാണ് അതിന്റെ അടിസ്ഥാന കാരണം. ഇതിനെ മറികടക്കത്തക്കരീതിയിൽ ഉൽപാദനക്ഷമതയും ഉൽപാദനവും ഉയർത്തുന്നതിനുള്ള പാക്കേജ് ഫലപ്രദമായി നടപ്പാക്കാൻ കഴിയുന്നില്ല’– അദ്ദേഹം പറഞ്ഞു. പൊലീസിനെ വിമർശിച്ച തോമസ് ഐസക് കാലഹരണപ്പെട്ട ചട്ടങ്ങൾ മാറ്റുന്നില്ലെന്നും ആരോപിക്കുകയുണ്ടായി.