പുകവലിക്കാൻ പഠിപ്പിക്കുന്ന ഛത്തീസ്ഗഡ് മന്ത്രിയുടെ വീഡിയോയ്ക്ക് എതിരെ സാമൂഹ്യ മാധ്യമങ്ങളിൽ വ്യാപക വിമർശനം. മന്ത്രി കവാസി ലഖ്മയുടെ വീഡിയോ വൈറലായതിന് പിറകെ സംസ്ഥാനത്തെ പ്രതിപക്ഷമായ ബിജെപിയാണ് രൂക്ഷവിമർശനവുമായി രംഗത്തെത്തിയിട്ടുണ്ട്.. മന്ത്രി ബീഡി വലിച്ചുകൊണ്ട് എങ്ങനെയാണ് വലിക്കേണ്ടതെന്ന് ഒരു ഗ്രാമീണനോട് പറയുന്ന വീഡിയോയാണ് സോഷ്യൽ മീഡിയയിൽ പ്രചരിച്ചു വരുന്നത്.

വായിലൂടെ പുക ശ്വസിക്കാനും മൂക്കിലൂടെ പുറത്തുവിടാനും മന്ത്രി ഗ്രാമീണനോട് വിഡിയോയിൽ പറയുന്നു. കവാസി ലഖ്മ ബീഡി വലിച്ചുകൊണ്ടാണ് ഗ്രാമീണന് പുകവലിക്കാനുള്ള ക്ലാസ് കൊടുക്കുന്നത്. വീഡിയോക്കെതിരെ രംഗത്തെത്തിയ ബിജെപി സംസ്ഥാന സർക്കാർ ലഹരിവസ്തുക്കളുടെ ഉപയോഗത്തെ പ്രോത്സാഹിപ്പിക്കുകയാണെന്ന് ആരോപിച്ചിട്ടുണ്ട്.

വിഷയത്തിൽ കോൺഗ്രസ് പ്രതികരിക്കാത്തതിനെതിരെയും ബിജെപി രൂക്ഷവിമർശനം ഉന്നയിച്ചിട്ടുണ്ട്. സർക്കാരും കോൺഗ്രസും വിഷയത്തിൽ കണ്ണടയ്ക്കുകയാണ്. ലഹരിമരുന്ന് ഉപയോഗത്തിന്‍റെ അന്തരീക്ഷം വളർത്തിയെടുക്കുകയാണെന്നു ബിജെപി വക്താക്കളായ അനുരാഗ് സിങ്ഡിയോയും നളിനീഷ് തോക്‌നെയും കുറ്റപ്പെടുത്തി.

സംസ്ഥാനത്ത് മദ്യ-ലഹരിമരുന്ന് റാക്കറ്റ് വ്യാപകമാണെന്ന് തെരഞ്ഞെടുപ്പ് കമ്മിഷനും വ്യക്തമാക്കിയിരുന്നു. തെരഞ്ഞെടുപ്പ് കമ്മിഷന്‍റെ ആശങ്ക അതീവ ഗുരുതരമാണെന്നും ബിജെപി നേതാക്കൾ പറഞ്ഞു. ഇക്കാര്യം ബിജെപി പലതവണ സംസ്ഥാന സർക്കാരിന്‍റെ ശ്രദ്ധയിൽപ്പെടുത്തിയിട്ടുണ്ടെന്നും നേതാക്കൾ പറഞ്ഞു. സംസ്ഥാനത്ത് മദ്യനിരോധനം ആവശ്യമില്ലെന്ന് കോൺഗ്രസ് നേതാക്കൾ നടത്തിയ പ്രസ്താവനക്കെതിരെയും ബിജെപി നേതാൾ രംഗത്ത് വന്നിട്ടുണ്ട്.