ചെന്നൈ . തമിഴ്നാട് മുഖ്യമന്ത്രി എം.കെ സ്റ്റാലിനും മകൻ ഉദയനിധി സ്റ്റാലിനും ഹിന്ദുക്കൾക്കെതിരെ ഗൂഢാലോചന നടത്തുന്നുവെന്ന് തമിഴ്നാട് ബിജെപി അദ്ധ്യക്ഷൻ കെ.അണ്ണാമലൈ. സംസ്ഥാനത്തിന്റെ ജിഡിപിയെക്കാൾ ഉയർന്ന തോതിൽ സമ്പാദിച്ച് കൂട്ടുക എന്നത് മാത്രമാണ് ഗോപാലപുരം കുടുംബത്തിന്റെ ലക്‌ഷ്യം. ക്രിസ്ത്യൻ മിഷണറിമാരിൽ നിന്നും അച്ചാരം വാങ്ങുകയാണവർ. സനാതന ധർമത്തെ ഉന്മൂലനം ചെയ്യണമെന്ന ഉദയനിധി സ്റ്റാലിന്റെ പ്രസ്താവനയോട് പ്രതികരിക്കുകയായിരുന്നു അണ്ണാമലൈ.

ക്രിസ്ത്യൻ മിഷണറിമാരിൽ നിന്നും അച്ചാരം വാങ്ങിയാണ് ഉദയനിധിയും അദ്ദേഹത്തിന്റെ പിതാവും ഹിന്ദു വിരുദ്ധത പ്രചരിപ്പിക്കുന്നത്. ഉദയനിധി സ്റ്റാലിനും അദ്ദേഹത്തിന്റെ പിതാവുമെല്ലാം ക്രിസ്ത്യൻ മിഷണറിമാരിൽ നിന്നാണ് ആശയങ്ങൾ സ്വീകരിച്ചത്. ആ മിഷണറിമാരുടെ ആശയം നിങ്ങളെപ്പോലുള്ള വിഡ്ഢികളെ അവരുടെ ക്ഷൂദ്രമായ പ്രത്യയശാസ്ത്രത്തിന്റെ തത്തയാക്കുക എന്നതായിരുന്നു, അണ്ണാമലൈ പറഞ്ഞു.

താങ്കൾക്കും താങ്കളുടെ പിതാവിനും ആകെ ചെയ്യാൻ കഴിയുന്നത് ക്രിസ്ത്യൻ മിഷണറിമാരിൽ നിന്നും അച്ചാരം വാങ്ങി ഇങ്ങനെ മൈക്കിന് മുന്നിൽ നിന്ന് ഗീർവാണം വിട്ട് നിരാശ തീർക്കൽ മാത്രമാണെന്നും ഉദയനിധിയെ ഓർമിപ്പിച്ച അണ്ണാമലൈ, തമിഴ്നാട് ആത്മീയതയുടെ മണ്ണാ ണെന്നും പറഞ്ഞു. സനാതന ധർമം ഡെങ്കിയും മലേറിയയും ഫ്ലൂവും പോലെയാണെന്നായിരുന്നു ഉദയനിധി സ്റ്റാലിന്റെ പരാമർശം. സനാതന ധർമം എതിർക്കപ്പെടണമെന്ന് മാത്രമല്ല, ഉന്മൂലനം ചെയ്യപ്പെടണമെന്നും ഉദയനിധി പറയുകയുണ്ടായി. സനാതന നിരോധന കോൺഫറൻസിൽ സംസാരിക്കുമ്പോഴാണ് ഉദയനിധി ഇങ്ങനെ പറഞ്ഞത്.